عرعور" يقف مع الثورة السورية
المنحبكجية: يسقط العراعير
أصالة تقف مع الثورة السورية
المنحبكجية: يسقط الأصاليل
...
علي فرزات يدعم الثورة
المنحبكجية: يسقط الفرازيت
كندة علوش تقف مع الثورة
يسقط العلاليش
فارس الحلو...
يسقط الحلوين
المنحبكجية: يسقط الغليونيون و الرفاعيع "الشيخ الرفاعي" و النابلسيون...و شو كمان؟
كل ماواحد وقف مع الثورة بدكن تختصروا كل الثوار فيه؟
و تصبغوها بلونو؟
مين الكن انو نحنا كلنا تفكير واحد و منطق واحد امشان هيك رفضنا بشار؟
مين قلكن مافينا علمانيين "اذا مو كل العلمانيين معنا" و مافينا متشددين و لادينين و مافي حرمية و مافي سرسرية و مافي متعلمين و مافي نضاف و مافي فاسدين و مافي من كل الطوائف و الأعراق السورية ؟
مين قلكن انو نحنا حابين نتخلف ؟ مين قال انو الكل عندن نفس التوجه ؟
مين قال انو نحنا حابين نرجع لزمن الخلافة و ما رح ندافع عن حق الأقليات أكتر و أكتر بهويتهن السورية ؟
ليش هيك عم تحسبوها ؟
يمكن بتقيسوها عحالكن
يمكن هي مشكلتنا معكن
انتو حابين تختصروا سوريا كلها و حياتنا بشخص
لازم لأنكن انتو بشاريين نكون نحنا مدري مين
امفكرين نحنا مو قدرانين نفرق بين عرعور و غليون ؟
انو يعني نحنا لازم نطلع حدا بدال بشار و نعبدو و نبوس شوئسمو؟
متى ما الواحد عارض بشار معد نحاسبو خلص و نشوف اذا كان حرامي متل خدام او نضيف متل كيلو ؟
يعني خلص طمستو هويتنا و اعتبرتونا قطيع عم ندور عراعي ؟ عم نلحق واحد شخص واحد لانو واقف ضد بشار ؟ ماعم تصدقو انو هالشعب ممكن يتطور و يفهم بالتعددية و الديمقراطية ؟
لازم يكون في مؤامرة و محرض لنحلم برئيس جديد؟ وحياة جديدة ؟
لازم نرضخ لبشار الأسد لأنو عندو مئات الآلاف من عناصر الأمن و المخابرات؟ و هيك يعني منصير أكابر؟ منصير متل الغالبية يعني فهمانين؟ هيك الامان بنظركن بيفضل هالمئات الألوف من عناصر الامن الاكابر؟ و البقايا عراعير مابيفهموا و لازم نربيهن و مابيعرفوا يرجعوا الامان لهل بلد؟
معقول مو قدرانين تشوفوا حالكن بمرايا ؟ انتو عم تأيدوا عناصر أمن أعرعر من العراعير
يعني مثلا ً هاد عنصر الامن متربي أو شامم ريحتا؟ أو عندو مبدأ او مؤمن بشي او مثقف او واعي لنوثق فيه و نأمنو عحياتنا؟
ليكون صاروا قاتلين فوق ال 2000 زلمة لأنن عارضو رأين
و مو فارق معن لامقدسات دينية و لا تراث حضاري و لا حتى أرواح بني آدمين
"هدول لسا أضرب من طالبان لما حطموا تماثيل بوذا"
في أسوأ من هيك ناس نأمنن عالبلد و أهلها؟
و عفكرة
انتو يلي طامسين شخصيتكن بإيدكن و مالكن أي قرار
تخيلو يطير بشار بسبب ما؟
شو بتصيروا ؟ شو بتعملوا ؟ بتقتلوا حالكن؟
بتصيروا منتحرجية ؟
ليش هي مو بلدكن ؟ ماعدلكن كلمة فيها متى ماراح بشار؟
لك حبوا حالكن أحسن منو
و الرئيس يلي جاية اذا ماعجبنا كلنا منغيرو
معد في للأبد و حكم واحد و حزب واحد و قناة وحدة و رأي واحد و مساخر حافظ الأسد
كلنا بوكرة منصير منحبكجية لهل بلد...للحياة...لبعضنا..للجدال.
و ياريت مانعيد غلطتنا كل مرة...بانو نترك اسم بلدنا يرتبط باسم شخص أو عيلة
نقلا عن : Michael Freeman
رائعة
ردحذف